Assam tuilianin ziaawm lam pan zel

Assam state-a tuilian chuan ziaawm lam a pan zel a, mahse Nilaini thleng khan tuilian hian mi nuai hnih vel a la nghawng a ni.

Assam State Disaster Management Authority (ASDMA) report tihchhuah thar chuan, tuilian hi district pasarih-a revenue circle 10 leh thingtlang khaw 349 a la nghawng buai niin an sawi. Ram hectare 651.40 vel chu tuiin a la chim.

Tuilian tuarte awmna tur relief camp 71 siamah mi 17,014 an la khawsa mek a, relief distribution centre panga siam a la ni bawk.

Kumina ruahsur nasa avanga Assam-a chhiatna thleng hi kum tam tak chhunga chhiatna thleng nasa ber zinga mi nia sawi a ni. State official-te chuan tuilianin thil a tihchhiatte hlut zawng hi hriatchian la ni lo mah se, cheng vaibelchhe 10,000 hu vel chu a tling dawn niin an sawi.

April thla aṭanga ruahsur nasa avangin state chhunga district 35 zingah 34-in tuilian an tuar a, district 11-ah leimin nasa tak a thleng bawk. March 1-July 11 chhunga Assam-a ruahtui tla hi 2,063.8 mm a tling niin India Meteorological Department (IMD) chuan a tarlang.

Tuilian vang hian district hrang hranga luia tuilian danna siamte chu a chhia a, thlai chinna ram leh chenna in tam tak a chhe bawk. ASDMA CEO GD Tripathi chuan chenna in 20,922 chu luah tlak loin a chhe vek niin a sawi a,a ṭhen lai chhia in 2,02,671 a awm bawk tih a sawi. Ran vulh 53,781 chu tuilian hian a len niin a sawi bawk. Tuilian tuarte awmna tur hian relief camp 4,054 zet an siam hman a ni.

Guwahati-based independent water expert Mirza Zulfiqur Rahman chuan kumtinin Assam-ah hian tuilian vanga chhiatna a thlen belh zel a, kum 2017 aṭang phei chuan tuilian hi a nasa chhoin, a thil tihchhiat pawh a tam zel niin a sawi. An state-in tuilian nasa tak an tawrh chho rengna chhan thil tam tak a awm a, heng zingah climate change chu a chhan pakhat a ni, a ti.