President-a thlan tlin ka nih chuan CAA hman a nih lohna turin ka bei ang : Yashwant Sinha

India President thar thlanna neih tura eptu party-te joint candidate, Yashwant Sinha chuan thlan tlin a nih chuan, Citizenship Amendment Act (CAA) hman a nih lohna turin a bei dawn tih a sawi.

Nilaini khan Yaswant Sinha hian Assam-a eptu MLA-te kawmin, CAA hi hmanhmawh takin, atthlak taka duan a nih avangin tun thlengin BJP kaihhruai sorkar chuan a la hmang thei lo a ni, a ti.

"Assam tan citizenship chungchang hi thil buaipui tham tak a ni. Sorkar chuan ram pumah he dan hi hman duh mah se, tun thlengin a la hmang thei lo a ni. A hmain Covid an chhuanlam a, mahse tunah pawh an la hmang thei chuang lo a ni," tiin Sinha chuan a sawi.

Ram danpui dinhmun hi pawn lam aṭanga beihna avanga derthawng ni loin, ram chhunga thuneitute avanga derthawng thei a ni tih sawiin, 'Kan venhim tlat a ngai a ni," a ti. Sinha hian July 18-a President thlanna neih turah campaign mekin, Assam hi ni khat chamin a tlawh a ni.