Meghalaya CM-in TMC hruaitu thusawi chhang let

Meghalaya chief minister Conrad K Sangma chuan Trinamool Congress (TMC) hruaitu, Dr Mukul Sangma-a'n Assam-Meghalaya border agreement chungchang a sawidan chu thil awihawm lo leh pawi tak a nih thu a sawi.

Mukul Sangma hian state pahnihten hun rei tak ramri buaina an lo neih tawh chinfelna tura inremna an ziah chu sawiselin, he inremna siam hi a ṭha tawk lo a, state mipuite duh dan pawh a ni lo niin a sawi. Nakkum state assembly inthlan neihah an party chuan sorkarna an siam thei a nih chuan, border agreement lo siam tawh hi ṭhiah a tiam a ni.

Chief Minister chuan TMC lamin thuchhuah an siam dan chu pawi a tih thu sawiin, ramri chungchanga buaina rei tak an lo neih tawh chinfelna tur hian TMC hian engmah hma lakna an nei lo a ni, a ti. Inremna siamna turah engmah tha an thawh ve lo a, tunah inremna siam fel a nih theih tak si avangin ṭhiah leh hi an duh mai a ni, tiin Conrad Sangma chuan a sawi. Rilru kawi pu loin, hun rei tak an lo buai tawhna an chingfel thei ta chu hlim taka pawm zawk turin a ngen bawk.