Manipur-a tribal group-in NRC kalpui duh

Manipur leilung fa, tribal group-te chuan an state-ah National Register of Citizen (NRC) kalpui an duh thu sawiin, prime minister Narendra Modi hnenah memorandum an thehlut.

Tribal federation 19-te intelkhawm chuan an state-a ramdang mi, dan loa awmte hriatchhuah leh, detention centre-a dah a, an ram lamah thawn kir leh an nih theihna turin NRC hi kalpui an duh tih an sawi. Memorandum an thehluh hi union home minister Amit Shah, Manipur governor La Ganeshan leh chief minister N Biren Singh hnenah a copy an pe bawk.

Organisation hian Manipur-a Bengal Eastern Frontier Regulation of 1873 a hman avangin sorkar laipui chu lawmthu an hrilh bawk a ni. He dan hman vang hian Manipur chu hmachhak state zinga Inner-Line Permit (ILP) system hmang thei palina a ni.

Tribal pawlten memorandum an thehluh hma hian state chhunga zirlai pawl pasarih-te chuan state leilung fa dik takte humhim a, ram dang aṭanga dan loa lutte danna turin NRC kalpui an duh thu hi an lo sawi tawh bawk. An state-a tualchhung mi ni lo an pung chak lutuk chu ngaihven a ngai tawh hle nia sawiin, hei hian leilung fa dik takte dinhmun a tiderthawng thei a ni, an ti.