Sikkim-in State Day vawi 43-na lawm

Sikkim chuan state a nih kum 43-na chu Thawhlehni khan a lawm.

State day lawmna inkhawm hi Chintan Bhawan-ah buatsaih a ni a, Governor Shriniwas Patil chuan a hmanpui a ni. Governor chuan state day pualin mipuite chu duhsakna a hlan. Sikkim sorkar hnathawh tawh te chu chhinchiah tlak tak tak te a nih thu a sawi a, hmasawn zel turin duhsakna a hlan. Sikkim chu India rama state hmasawn ber te zinga mi a nih thu sawiin, state dangte entawn tlak khawpa hma la zel turin a fuih. Chief Minister Pawan Chamling-a kaihhruaina hnuaiah nasa takin hma lam an pan zel tih sawiin, mipuite chu sorkar hmalakna thlawp zel turin a sawm bawk.

Chief Secretary A.K. Shri­vastava chuan state sorkar hna­thawh hrang hrangte leh, hmachhawp an neih eng emaw zat a tarlang. Sorkar Department hrang hranga thawktute nasa zawka mipuite rawngbawl hna thawhna kawnga ke pen tura fuihin, Information & Public Relations Department-in sorkar hmalakna hrang hrang tarlanna document an siam chu ropui a tih thu a sawi bawk. Lawmna inkhawm buatsaihah hian Information & Public Relations Department-te'n documentary film an buatsaih chu tlangzarh a ni. Documentary-ah hian state-a hlankai an nih kum 1975 aṭanga tun hun thlenga thil thleng larsar tak tak te tarlan a ni.

Sikkim hi India ram state hmasawn ber-te zinga mi niin, kum 2016 khan 'Organic State' hmasa berah puan an ni. A hnathawh ṭhat avangin award eng emaw zat hlan a ni tawh. Chief minister Chamling chu tunhnai khan Public Service lama hna a thawh ṭhat a vangin, President Pranab Mukherjee chuan Bhairon Singh Shekhawat Lifetime Achievement Award a hlan a ni. Chamling hi kum 1994 khan chief minister atan lakluh niin, kum 22 chhung ro a rel tawh a ni. A kaihhruaina hnuaiah state chuan nasa takin hma sawn a, state intodelh ni tura hma a lakna kawngah te, tourism lama a hmalakna te chuan fak a hlawh hle a ni.