Assam-ah Covid-19 vangin mi paruk thih belh

Assam-ah Thawhlehni khan Covid-19 vangin mi paruk an thih belh leh a, he hri vanga thi hi mi 46 an tling tawh. Thawhṭanni khan he hri vang hian mi pali an lo thi tawh bawk a ni. Thawhlehnia hri kai hmuh thar zingah Guwahati Central Jail-a tang mi 50 an tel. Hemi ni vek hian hri kai enkawl zinga mi 757 chu an dam tawh avangin enkawlna hmun aṭangin chhuah tir an ni. 

Nimin khan Assam-a hri kai hmuh chhuah belh mi 859 an awm a, heti hian Covid-19 kai hmuh tawh hi mi 18,666 an tling tawh. An zinga 12,173 chu enkawl dam ni tawhin enkawl mek 6,444 an awm bawk a ni. Guwahati khawpui chhunga hri kai an pun belh zel avangin health department chuan Thawhlehni aṭang khan Athgoan leh Fancy Bazar-ah test runpui a buatsaih a, Pandu-ah in tina kalin test neih sak an ni bawk. 

Ni nga kal ta chhungin Guwahati-ah hian Covid-19 kai 2,100 hmuh belh an ni. Health minister Himanta Biswa Sarma chuan Gauhati Medical College and Hospital (GMCH) tlawhin, Covid-19 kai enkawl mekte dinhmun a zawt a; principal, superintendent leh doctor-te kawmin dam lo enkawl an nih dan leh an infrastructure dinhmunte a sawipui. 

Sarma chuan doctor leh thawktu dangte chu fimkhur leh in enkawl uluk turin a chah. Minister hian IIT Guwahati leh Amingaon-a MSME Training Centre-a Covid-19 Care Centre-te pawh a tlawh bawk.