Union cabinet-in Assam-ah IARI din remti

Prime Minister Narendra Modi-a kaihhruai union cabinet chuan Assam-ah Indian Agricul­tural Research Institute (IARI) din a remti a, a senso atan cheng vaibelchhe 155 a pawm bawk.

Ningania cabinet meeting chuan IARI hi hmarchhakin agriculture leh a kaihhnawih zirna lama hma a sawn theih nan leh, green revolution bul ṭanna atana ruahmanna a nih thu a tarlang. Meeting kaihruaitu Narendra Modi chuan IARI hi ram chhungah pakhat chauh din a la nih thu leh, kum 1967 khan Delhi-ah din a nih thu a sawi. Kum 2014-15 budget-ah khan IARI dinna tur hi dah a lo ni tawh tih sawiin, a kaihhruai NDA sorkar chuan ram chhunga pali din turin hma a la mek tih a sawi. Modi chuan, Assam-ah din a nih lawk lohna chhan chu Congress kaihhruai sorkar vang niin a sawi a, state sorkarin ram a pe duh lo niin a sawi. Mahse chief minister Sarbananda Sonowal-a kaihhruai BJP sorkar chuan IARI dinna tur hian ram acre 587 a ruahman tak avangin, din a ni thei dawn ta a ni, a ti.

Union Minister Piyush Goyal chuan IARI hi Dhemaji district-ah din a ni dawn tih sawiin, hna ṭan thuai beisei a ni, a ti. IARI chu peihfel a nih hunah chuan hmarchhak mipuiten ṭangkai taka an hman theih a beisei thu leh, hmasawnna thlentu a nih ngei a beisei thu a sawi.