ONGC thli vangin Agartala-ah tui sem titawp
Oil and Natural Gas Corporation (ONGC) ten oil an sawngbawlna thli chu, Tripura khawpui Agartala chawmtu lui Howrah-ah a luan luh avangin, Nilaini ṭang khan tui sem tihtawp lailawk a ni. Hei hian khawpuia cheng mi nuai ruk chuang zet a nghawng a ni.
State Water and Sanitation Department Chief Engineer Bishu Debbarma chuan oil sawngbawlna thli hi Thawhlehni aṭang khan Howrah luiah hian a luang lut ṭan a, mihring hriselna khawih pawi thei chemical a tel avangin tui lakluh chu tihtawp nghal a ni, a ti. Hei vang hian water treatment plant pali chu khar nghal a ni a, Agartala Municipal Corporation area huamchhungah tui sem chhuah tihtawp nghal a ni, a ti. Tui endik hna hi Water Supply Department leh West district administration official-te chuan chhun zan zawmin an thawk a ni.