Japan-in hmarchhaka project kalpui a thlawp dawn : Japan Ambassador

Japan ambassador to India Kenji Hiramatsu chuan hmarchhaka project kalpui hrang hrangte chu Japan sorkar chuan a thlawp dawn tih, Union Minister of State (Independent Charge) for Development of North Eastern Region (DoNER), Dr Jitendra Singh a hrilh.

Japan ambassador Hi­ramatsu leh DoNER mi­nister Jitendra Singh-te hian hmarchhaka project kalpui mek te an sawi dun a, thawhdunna tur kawng hrang hrang an sawi bawk. Hiramatsu chuan hmar­chhakin leilung hausakna a neih ṭhat thu sawiin, India sorkarin hmarchhak a hawi ang bawkin, Japan sorkar pawhin India hmarchhak nena inzawmna ṭha neih a duh a ni, a ti. Japan sorkar chuan Assam-ah invesment tih a duh a, Manipur leh Nagaland-ahte pawh huang zauh zel a duh tih a sawi. Hmarchhak state-te nena entrepreneurship leh sumdawnna lamahte thawhhona ṭha a awm chuan hmasawnna tam tak a kengtel dawn tih sawiin, hemi tur hian Japan sorkar chu a inhawng zau hle tih a sawi bawk.

Dr Jitendra Singh chuan Japan sorkar inhuamna chu ropui a tih thu leh, tih­hlawhtlin ngei a beisei thu a sawi. Hemi tihlawhtling tur hian DoNER ministry chuan Japan sorkar thawhpui turin hma a lak tur thu a sawi.

Project lian - tui hmanga inkalpawhna siam te, rel kawng leh motor kawngpui bakah lei dawhnaah te Japan chu thawhpui an duh tih a sawi bawk. Kenji Hiramatsu leh Dr Jitendra Singh-te hian Japan leh India hmarchhak inlaichinna lo neih tawh ṭhin dan te an sawi dun bawk a, World War II hun laia hmarchhak aṭanga British sipai beihlet an nih dan te an sawi dun a ni.