Sikkim frontline worker zingah hri kai an pung

Sikkim-ah hri kai hmuh chhuah belh mi 45 an awm a, an zinga a tam zawk hi frontline worker an ni. State chhunga hri kai hmuh tawh hi mi 198 an ni tawh a, an zinga 112 chu enkawl mek an ni. 

Health Director General Pempa Tshering Bhutia chuan hri kai hmuh thar zingah hian GREF worker, health worker, police, leh SSB jawan-te an tel thu a sawi. Rongli biala Covid-19 kai pakhat chu rural management minister Sonam Lama nen awmdunna an lo neih avangin, Lama leh minister dangte pawh test neih sak vek an ni dawn. Minister-te bakah an contact neihte pawh chhui zui vek tum a ni. 

Chief minister Prem Singh Golay chuan hri kai pun  belh zel  mah se, state puma total lockdown puan erawh a ngai lo niin a sawi. Mahse nimin aṭanga July 29 thleng atan district inzinpawh erawh khap a ni. Army, paramilitary leh GREF worker zingah hri kai awm belh zel mah se an state-a luh an khap thei lo tih CM chuan a sawi. "Sipai leh GREF worker-te kan lo dang ngawt thei lo. Ramria venhim hna thawhnaa mi pawimawhte an ni a, anni ang bawkin SSB, ITBP leh midangte pawh luh khapsak theih an ni lo a, mahse state-a lut turte chu screening neih an nih hnuah Rangpo-ah Antigen Testing neih tir zel an ni ang," a ti.