Air India-in India hmarchhak lam an hawi

Air India chuan India hmarchhak lamah huang zauh tumin hma an la leh mek a, an Chairman leh Managing Director ni bawk Ashwani Lohani chuan June thla khian ni thum chamin hmarchhak a rawn tlawh dawn.

Air India Director Lohani chuan, "Hmar­chhakah huang zauh tumin hma kan la mek a, Airbus leh Turboprop aircraft service tir tum a ni" a ti. Hemi atan hian hmalakna kalpui mek a nih thu sawiin, thla leh khian hmarchhak tlawha zin a tum thu a sawi. Stae hrang hranga Airport-te chu zirchian a ni dawn tih sawiin, Agartala (Tripura), Aizawl (Mizoram), Dimapur (Nagaland), Imphal (Manipur), Shillong (Meghalaya), Dibrugarh, Silchar, Tezpur leh Lilabari (Assam)-te chu zirchian an tum tih a sawi. Heng hmunah te hian Air India chuan Airbus leh Turboprop aircraft tam zawk service tir a tum a ni, a ti. Hei bakah hian Delhi-Guwahati inkar service pawh dah belh an tum thu a sawi bawk.

Tarlan dan chuan Air India hian kumin October thla aṭangin thlasik chhung bik atan Guwahati, Imphal leh Bagdogra-ahte flight a service tir dawn. Tun dinhmunah Air India hian Kolkata aṭangin hmarchhak huam chhungah flight 19 zet a service tir mek a, heng zingah hian Guwahati - Imphal, Lilabari - Tezpur pawh a tel. Hei hi duh tawk mai loin huang zauh zel turin hma an la leh mek a ni.