Kaziranga chhunga lirthei tlan chak dan bithliah
Assam-a Kaziranga National Park (KNP) huamchhunga lirthei tlanchak dan chin bithliah siam a ni a, dan zawm lo te chu cheng 5,000 chawi tir theih an ni.
Hemi chungchangah hian National Green Tribunal (NGT) chuan Nilaini khan thuchhuah siamin, dan zawmlo te chu Motor Vehicles (MV) Act tlawhchhanin cheng 5,000/- thleng chawitir theih an nih thu a tarlang. KNP-ah hian kumin chhungin lirthei sut hlum ramsa pali an awm tawh a, hemi chungchangah hian Park Director chu NGT-ah hian zualkoin, NGT Chairperson Justice Swatanter Kumar chuan thupek hi a tichhuak ta a ni. Bench chuan Assam sorkar leh KNP director-te chu lirtheiin ramsa a sut hlum tawh zat tarlang turin a lo hriattir tawh bawk a ni.
Environmentalist Rohit Choudhury pawhin National Highway-37 tihzauh chuan ramsa leh nungchate tan harsatna a thlen thei nia sawiin, Court-ah a lo zualko tawh a ni. NH-37 hi Jakhalabandha - Bokakhat inkalpawhn a ni a, Kaziranga Park a paltlang a ni. NGT chuan NH 37 kama dawr leh hotel te chu khar vek turin alo hriattir tawh bawk. Mahse hei hi Gauhati High Court chuan tidanglamin, NH aṭanga metre 100 aia hnai loah an insawn a phalsak a ni. Sorkar laipui chuan Kaziranga National Park hi Eco Sensitive Zone-ah a puang tawh bawk.