AP khawpuia restaurant signboard-ah bawngsa tih thu ziah lan khap

Arunachal Pradesh khawpui, Itanagar-a hotel leh restaurant signboard-ah bawngsa tih thu ziah lan khap a ni.

Itanagar Capital Region magistrate chuan signboard-a bawngsa tih ziahlan hi tireh vek turin thupek a chhuah a, he hi sakhaw kaihhnawih thei thil a nih vang niin a sawi. Sakhaw ṭhenkhat zuitute rilru ti na thei leh, pawl hrang hrang inkara inhuatna thlen thei a ni, a ti.

Naharlagun town extra assistant commissioner (EAC), Tamo Dada chuan he thupek hi nakin zelah pawh sakhaw kaihhnawih thila buaina a awm lohna turin an tichhuak niin a sawi. "He thupek avang hian mipuite tan thil hriatthiam loh tur a awm lo a, bawngsa ei hi khap a ni chuang lo a ni," tiin mi ṭhenkhat hnen aṭangin hetianga signboard-a bawngsa ei tur an neih thu an tarlan hian Hindu sakhaw zuitute rilru a ti na tia complaint an dawn thu a sawi.

Dada chuan, "Hindu-te chuan bawngsa an ei lo mai ni loin, bawng chu an serh a, venhim an duh a ni. Ram chhung hmun dangah hotel leh restaurant-ahte bawngsa hi siam ve vek mah se, ualau taka signboard-a an ziahlanna hi a awm lo ang," a ti. Hotel leh restaurant neitute chuan ṭawngkam dangin, midang rilru ti na lo zawngin bawngsa an siam thu hi an sawi thei a ni, a ti.

"Mi zawng zawngin Arunachal Pradesh-ah bawngsa hi kan ei nasa a, hotel-ah pawh kum tam tak chhung an lo siam tawh tih an hre vek a, hei vang hian signboard-a ziah lan a nih loh avangin mipuite tan hriatthiam loh phah tur a awm lo," tiin Dada chuan a sawi.

Thupek tihchhuah hnua hotel leh restaurant signboard-a bawngsa tih thu inziak an hmuh chu official-te chuan rawngin an kah hnan zel dawn a , a ṭul a nih chuan thupek zawm loh man Rs 2,000 pawh chawitir an ni ang, a ti.

Hetih lai hian mipui tam zawk chuan he thupek hi sawiselin, social media lamah pawh an lungawi lohna thu an tarlang nasa hle.