Nagaland CM-in district hrang hrang tan sound speaker sem

Nagaland chief minister Neiphiu Rio chuan state sorkar chuan music leh arts chawilar tumin hma a la a, music chu kawng ṭha kawhhmuhtu hmanrua atan hman an tum tih a sawi.

Ningania Kohima-a CM residential complex-a sound speaker semchhuahna hun a hmanah he thu hi sawiin, Rio chuan hel pawl leh Armed Forces (Special Powers) Act (AFSPA) avang chuan pawn lam miten an state an thlir dan chu a danglam ṭhin tih a sawi. Mahse Nagaland state chu mipui ngainatawm leh muanna duhtute awmna, ṭhalai talent nei ṭha tak, hmathlir ṭha tak neite awmna a ni a, a thim zawng lam ngaihtuah lo tura an ngaihtuahnate lakpen a ngai a ni, a ti.

Task Force for Music and Arts (TaFMA) hmalaknaa district hrang hrang tana sound speaker sem a ni chu lawmawm a tih thu a sawi a, hemi rual hian TaFMA thawhpuitu mima leh pawl hrang hrangte fakin, state sorkar pawhin music sector tihmasawn tumin a bei zel tih a sawi. District hrang hranga music leh art dinhmunte ena tlawh kual a chak thu pawh a sawi bawk.

TaFMA hian column speaker hi disrict 12 tan a sem a, hei hi district tina an thawhpuite hnenah pein, hei hi music lama talent neiten grassroot level aṭanga zirtirna ṭha an dawn theihna tura an tih a ni. Speaker bakah microphone leh microphone stand-te an pe tel bawk a ni.