Tripura cabinet-in kel vulhtute tana scheme siam pawm

Tripura cabinet meeting chuan state chhunga tribal, kel vulhtute puihna tura special scheme siam chu a pawm.

He scheme hnuaiah hian state sorkar chuan kel vulhtute chu sum hmanga a puih bakah, bank aṭanga puihna an dawn theihna tur pawh a ngaihtuah pui dawn tih education minister Ratan Lal Nath chuan a sawi.

"Tribal welfare department chuan rawtna hi rawn thlenin, cabinet chuan a lo pawm ta a ni. Tribal mite chawikan chu he scheme in a tum pawimawh ber a ni," a ti. He scheme hming atan hian 'Punbania' tih a nih thu leh, a awmzia chu 'goat business' tihna a nih thu a sawi bawk.

Scheme kalpuinaah hian Tripura Gramin Bank chu financing agency a ni dawn a, loan pek an nih aṭanga thla kua chhung chu rulh a ngai dawn lo a, an kel vulh aṭanga sum lakluh an neih aṭang chauhin loan hi an rul ṭan dawn a ni.

Minister chuan ran vulh tura kel an thlan bik chhan pawh sawifiahin, ran vulh chi hrang hrang zingah kel hi hri leng do thei ber nia a ngaih a ni a, vawk leh ar te angin an pul ve vak vak ngai lo tih a sawi. Hei bakah hian a chaw leh, a enkawlna pawh a hautak lo niin a sawi bawk.