AP: Itanagar-a bawngsa ziah lan khapna sut dawn

Itanagar Capital Region (ICR) deputy commissioner Talo Potom chuan Naharlagun extra assistant commissioner (EAC)-in hotel leh restaurant-a signboard-ah bawngsa tih ziahlan khapna thupek a tihchhuah chu sut a ni dawn tih a sawi.

EAC hian kar liam ta Nilaini khan bawngsa tih ziahlan khapna thupek hi tichhuakin, sakhaw kaihhnawih thilah midang rilru natna siam theitu niin a sawi a ni. Signboard-a ziahlan khap ni mah se, bawng sa ei leh siam erawh khap a ni chuang lo tih a sawi nghal bawk.

Inrinni liam ta khan ICR DC chuan he thuchhuah chungchang hi sawifiahin, 'EAC hian venthawn thilah he thupek hi a siam a, sakhaw lama inbeihna lam thilah ngaih tur a ni lo. He thupek hi sut leh a ni ang," tiin a sawi. Social media lama a hluhlang zawnga sawina pawh titawp turin mipuite a ngen bawk.