Nagaland sorkarin PM leh HM hnenah Inbiakna chhunzawm tura NSCN-IM sawm turin ngen

Nagaland sorkar chuan prime minister Narendra Modi leh union home minister Amit Shah-a Naga political issue chungchanga remna zawnga inbiakna neih chhunzawm tura NSCN-IM sawm turin a ngen.

State planning and coordination minister Neiba Kronu chuan, "Inbiakna hi tihtawp a ni tawh. Thutlukna siamna turin NSCN-IM hruaitute chu inbiakna neihpui leh tura sawm turin Prime Minister leh Union Home Minister hi kan ngen a ni," a ti.

Naga National Political Groups (NNPGs) erawh chuan harsatna an neih zui tawh loh avangin sorkar laipui nen hian eng hunah pawh inremna hi siam thei an ni tawh niin Kronu chuan a sawi bawk.

Inrinni liam ta khan State Banquet Hall-ah Parliamentary Committee on Naga Political Issue meeting neih a ni a, meeting-ah hian India sorkar leh NNPGS working committee-in remna zawnga inbiakna an neih meka an hmalakna chu ṭha an tih thu an sawi. Naga political group hrang hrangten inbiakna hlawhtlin theihna tura an inpekna chu lawmawm an tih thu an tarlang bawk a ni.

Meeting-ah hian resolution siamin, state chhunga organisation leh mimal hrang hrang te, Naga buaina chinfel duh avanga an ngaihdan leh thuchhuah an tarlan ṭhin chu mipuite rilruah hriatthiam lohna, inlungrual lohnate thlen palh theih a nih avangin ti tawh lo turin an ngen.