July 22 aṭangin hmarchhakah rel service pangngai thei tawh dawn

Assam-a Lumdign-Bardarpur section leimin nasa tak avanga Assam kaltlanga hmarchhak hmun danga khualzin phur rel service, thla hnih chuang tihtawp chu July 22 aṭangin dan pangngaiin tlan tir an ni thei tawh dawn tih Railway official chuan a sawi.

Northeast Frontier Railway chief public relations officer, Sabyasachi Dey chuan July 22 hian Kolkata aṭangin Agartala, Tripura panin Kanchanjunga Express tlan tir a ni dawn tih a sawi a, rel dang pawh a tahtawlin tlan tir an ni chho tawh dawn a ni.

Ruahsur nasa avangain leiminin May 14 khan Lumdign-Bardarpur section-a rel kawng a tichhia a, rel kawng hi km 83 vela thui a chhia a ni. Hei vang hian Lumding-Badarpur section kaltlanga Assam-a Cachar bakah Tripura, Manipur leh Mizoram-a rel service tihtawp a ni. Rel kawng chhe siam hna hi ngawrh taka thawh a ni a, July 12 aṭang khan bungraw phur relte chu tlantir an ni tawh a, July 22 aṭangin khualzin phur relte pawh an tlan thei tawh dawn a ni.

NFR chuan rel kawng chhiat hmaa ticket book tawhte chu engmah a cancel lo a, Inrinni liam ta aṭang khan ticket pawh book theih a ni leh ta bawk.