Assam : Sorkarin tuilian tuar zirlai nuai 1 chuang ṭanpui

Assam chief minister Himanta Biswa Sarma chuan an state-a tuilian vanga harsatna tawk, zirlai nuai khat chuang chu ṭanpuina, Rs 1,000 ṭheuh pek an nih ti a sawi.

Chief Minister chuan zirlai 1,01,539-te hnenah ṭanpuina hi Rs vaibelchhe 10.5 pek chhuah a nih thu sawiin, heng sumte hi Chief Minister's Relief Fund aṭangin pek a ni, a ti.

Assam tuilian hian ziaawm lam a pan zel a, state chhunga lui hrang hranga tuite pawh an kam tawh a, hlauhawm chhinchhiahna pel an awm tawh lo. Hetih lai hian mi nuai 2.1 vel chuan tuilian vang hian harsatna an la tawk a, Cachar district-ah mi nuai 1.2 leh Morigaon-ah mi 89,234-te chuan tuilian hi an la tuar. District paruk-a revenue circle pariat-a thingtlang khaw 799-te chu tui hian a la chim a ni.

Relief camp pawh 45 siam ala ni a, heng hmunah hian mi singkhat chuang an la khawsa mek.