Tripura : Mid-day meal vangin zirlai 35 dam lo

Tripura Dhalai district-a Chawmanu khuaa Dayaram Karbari Junior Basic English Medium School-a zirlai 35-te chu kar liam ta Inrinni khan mid-day meal an ei zawhah an dam lo a, primary health centre-ah hruai nghal an ni.

Zirlaite hi chaw chhun an ei zawh hian pum na, luakchhuak leh lu haiin an awm a, health centre-ah hruai an nih hnuah, enkawl an nih hnuah tam zawk chu haw tir leh an ni a, zirlai pasarih erawh chu health centre-ah hian enkawl zui an ni.

District health department chuan zirlaite, centre-a la enkawl mekte pawh an ngaihtuahawm tawh lo tih a sawi. Chaw chhun an ei hi enfiah turin a sample lak a ni a, vawiin hian Agartala-ah test tura thawn a ni dawn tih a sawi. Test neih hnuah zirlaite dam lohna chhan hi hriat theih a ni ang, a ti.

Doctor leh MLA-te chuan food poisoning nia an ngaih thu an sawi a, mahse test neih hma chuan engmah sawichian ngam a la ni lo tih an sawi bawk.