Rajnath-a'n Gangtok-ah review meeting hmanpui

Union Home Minister Rajnath Singh chuan Sikkim khawpui Gangtok-a review meeting neih a hmanpui a, he hun ah hian China ramri depa awm state chief minister-te an tel a ni.

Kar kalta Inrinni khan review meeting hi neih a ni a, Indo-China border chungchang an sawiho a ni. He hun hmanpuitu Union Minister chuan, China ramri depa awm hmarchhak state hrang hrang chief minister-te chu ram venhim kawngah nasa taka hma la turin a ngen a, ram mipuite himna chu ngaihpawimawh ber a ṭul thu a sawi. Sorkar laipui chuan ramri venhimna turin Border Areas Development Programs (BADP) project a kalpui mek tih sawiin, he project hnuaiah hian border infrastructure tihchangtlunna turin hma lak a ni, a ti. Rajnath Singh chuan Indo-Tibetan Border Police (ITBP)-te hnathawh fakawm a tih thu sawiin, sorkar laipui chuan an hnathawh a hre reng a, thuam chak zual turin ruahmanna a kalpui mek tih a sawi.

Sikkim Chief Minister Pawan Chamling chuan, Border Area Development Programme (BADP) project hmang hian scheme eng emaw zat an kalpui mek tih sawiin, hemi hmang hian ramri venna lam tihchak a nih thu a sawi. Border area-a chengte himna turin state sorkar chuan kawng hrang hrangin hma a la tih a sawi a, infrastructure thuam ṭhat a nih thu a sawi. Chief Minister Chamling chuan Union Home Minister Singh-a'n an state a tlawh chu lawmawm a tih thu a sawi bawk.

Meeting-a tel Uttarakhand Chief Minister Trivendra Singh Rawat leh Arunachal Pradesh Chief Minister Pema Khandu-te chuan China nen an inrinaa venhimna kenkawh dante an tarlang ve bawk. Anni bakah hian Jammu & Kashmir leh Himachal Pradesh aiawhte pawh an tel a, an state dinhmun an tarlang a ni. Department of Border Management, Ministry of Home Affairs, Secretary Sanjeevanee Kutty chuan meeting neih chhan te tarlangin, ramri venhimna atana sorkar laipui ruahmanna te a tarlang bawk. ITBP DG Krishna Choudhary pawhin an hnathawhte a tarlang bawk a ni.

Rajnath Singh chuan Indo-China Border-ah infrastructure tihchangtlun a pawimawh thu sawiin, chu chuan ram venhimna kawngah nasa takin a pui thei dawn a ni, a ti. Ramri depa awm state-te tan sorkar lapui chuan project a kalpui tih sawiin, border security force-te pawh thuam chak zel an nih thu a sawi. Sorkar laipui chuan Border Area Development Programmes (BADP) ataan a, kum 2016-17-a cheng vaibelchhe 990 dah chu, vaibelchhe 1100-ah a tipung tih a sawi.

India leh China inrina thui zawng hi km 3,488 zet a ni a, Jammu and Kashmir (1,597 km), Himachal Pradesh (200 km), Uttarakhand (345 km), Sikkim (220 km) leh Arunachal Pradesh (1,126 km)-te'n China hi an ri a ni. Ramri hmun ṭhenkhatah hian chhinchhiahna mumal tak a awm loh avangin buaina a chuak fo a, a bikin Line of Actual Control chungchangah ram pahnihte an innghirngho fo a ni. Sorkar laipui chuan ramriah hian Border Out Post (BOP) 173 zet a siam a, hengte hi Indo-Tibetan Border Police Force (ITBP)-te chuan chhun zan zawmin an vil a ni. Jammu and Kashmir-ah bik hian BOP 35 a awm a, Himachal Pradesh leh Uttarakhand huamchhungah 71, Sikkim leh Arunachal Pradesh huamchhungah 67 a awm a ni. Ministry of Home Affairs chuan ramri depah hian kawngpui a sial mek zel a, km 804.93-a thui siam nan cheng vaibelchhe 1,937 a ruahman a ni. Kumin April 30 thleng khan km 672.46-a thui siam zawh tawh a ni.

Gangtok-a meeting-ah hian Uttarakhand chief minister Trivendra Singh Rawat, Arunachal Pradesh chief minister Pema Khandu leh Sikkim chief minister Pawan Chamling-te an tel a, Jammu & Kashmir leh Himachal Pradesh-te chuan aiawh an tir ve bawk.