Sorkar laipuiin Assam tuilian 'severe calamity' ah a puang ; Eptuten sorkar laipui thuchhuah pholang turin CM an phut

Assam chief minister Himanta Biswa Sarma chuan kumina an state-a tuilian nasa tak an tawrh chu sorkar laipui chuan 'severe calamity' ah a puang a,chhawmdawlna sum pek ngei pawh a tiam tih a sawi.

Pathiannia Guwahati-a chanchinthar lakhawmtute a kawmnaah, Cheif Minister chuan he thu hi a sawi a ni. "Home Minister Amit Shah chuan tuilianin chhiatna hrang hranga thlente siamṭhatna leh, tuilian tuarte chhawmdawlna turah sorkar laipui chuan sum sen aṭanga 90% a pe dawn tih min hrilh a ni. Fund mamawh ang te min pek a remti a ni," a ti.

Kumina tuilian an tawrh chu a nasa ber nia sawiin CM Sarma chuan, "Hetiang anga tuilian nasa hi kan state-ah a thlen ka la hre ngai lo. Tuilian leh leimin vanga thi pawh hi kuminah an la tam ber tih pawh min hrilh a ni," a ti. April thla aṭang khan ruahsur nasa avanga chhiatna thlengah mi 195 an thi tawh a ni.

Tuilian leh leimin vanga harsatna chuan an state mipui hmun thuma ṭhena hmun khat vel a tibuai pha tih Sarma chuan a sawi a, ran vulh 54,837 an thi tih a sawi bawk.

Chhiatna nasa tak an tawhah sorkar laipui chuan relief package tih ang zawngin ṭanpuina pe lo mah se, chhanchhuah leh chhawmdawl hna an thawhah theihtawpin a pui a, sum senso aṭang pawhin 90% a tumsak dawn niin a sawi. State sorkar chuan tuilian tuar chhungkaw nuai 1.81 hnenah chhamdawlna Rs 3,800 ṭheuh leh, zirlai nuai 1.01 zirlaibu leina tur Rs 1,000 ṭheuh a pe tawh tih CM chuan a sawi.

Sarma chuan tuilianin in a tihchhiat 3,03,930-te siamṭhat hna thawh ṭan thuai a ni dawn a, July 20 aṭangin minister-te chuan in siamṭhat ngaite hi a hmunah an enkual dawn a ni, a ti. In chhe siamṭhatna atan hian sorkar chuan Rs vbc 400 vel a seng dawn tih a sawi bawk a ni.

Hetih lai hian eptu party-te chuan CM thusawi hi chhang nghalin, sorkar laipuiin 'severe calamity'-a a puan thu hi eng vanga thuchhuah siam lo nge an zawt nghal. "Sorkar laipui chuan eng vangin nge a puan mai loh" Engvangin nge CM-in a sawi? CM chuan severe calamity tia sorkar laipuiin a puanna, official notification chu pholang ngei rawh se," tiin Raijor Dal MLA Akhl Gogoi chuan a sawi.

Gogoi chuan, "Kum 2018 khan sorkar laipui chuan Kerala tuilian chu severe calamity-ah a puang a, Calamity Relief Fund pawh a siam a ni. Hetiang bawk hian Assam tan a siam ve dawn em?" tiin a zawt.