Assam leh AP sorkarin 'Namsai Declaration' ziak

Assam leh Arunachal Pradesh sorkar chuan state pahnihte'n ramri chungchanga kum tam tak buaina an lo neih tawh chinfelna hmalakna tur 'Namsai Declaration' an ziak.

State pahniha chief minister - Himanta Biswa Sarma leh Pema Khandu-te chuan kar liam ta khan Arunachal Pradesh, Namsai-a Chief Minister level meeting vawi thumna an neihah declaration hi an ziak a ni. Meeting-ah hian CM pahnihte hian an ram inchuh chin chu khaw 123 aṭangin khaw 86-ah tihniam an remti a, heng hmuna an buaina hi kumin September 15 hma ngeia chinfel hman an tum a ni. Khaw 37-a an buaina chu an chinfel tawh niin an sawi.

Arunchal Pradesh CM Pema Khandu chuan buaina an la neihna hmunte enfiah tur hian state pahniha regional committee-te chuan a rualin an tlawh dawn a, ramri hrula cheng mipuite ngaihdante lain, mipuiten an pawm tlan theih tur anga inremna hi siam tum a nih thu a sawi a ni. Regional committee-te hian September 15-ah state sorkar hnenah report thehlutin, hei hi state pahnih sorkarten an pawm dun theih chuan sorkar laipuiah draft MoU an thehlut zui dawn a ni.