Chakma zirlaiten AAPSU thil phut hnawl turin CM an ngen

Arunachal Pradesh Chakma Students Union (APCSU) chuan Arunchal Pradesh chief minister Pema Khandu hnenah Chakma-Hajong chungchanga All Arunachal Pradesh Students Union (AAPSU) thil phut chu hnawlsak turin an ngen.

AAPSU hian Thawhṭanni khan Diyun-a Extra Assistant Commissioner (EAC) office tlawhin, office hian Diyun administrative division-ah Chakma leh Hajong hnam 500 chuang hnenah residential proof certificate (RPC) a pe chhuak niin an sawi a, hemi chungchangah hian EAC office-a thawk official eng emaw zat chu hrem turin sorkar an phut a ni. Chief Minister chu action la tur hian ni 15 hun an pe.

APCSU chuan AAPSU thil sawi hi thu dik lo niin an sawi a, Diyun EAC S Roy leh Changlang Deputy Commissioner (DC) Sunny Singh-te thlawp turin an ngen. India ram hmun dangah, eng zirlai pawl pawhin sorkar office-te tlawhin, official-te meeting an neihpui laite chu video-in an la ngai lo tih an sawi. AAPSU chet dan chu Arunachal Pradesh tana hmingchhiatna a ni a, hei vang hian state sorkar chuan Diyun EAC leh Changlang DC-te chu dan kalha chete chungah action la turin a hriattir zawk tur a ni, an ti.

AAPSU hruaituten Arunachal Pradesh venhimna tur an nih thu an sawi pawh chhangin, Rup Singh Chakma chuan, "Chakma leh Hajong-te hi Arunachal Pradesh-a piang leh seilian ve bawk an ni a, an tan pawh an motherland a ni ve tho a ni. Constitution court-te pawhin India khua leh tui dik takah a pawm a, vote-te pawh an thlak thei ve vek bawk. AAPSU hian thil dik tak hi a pawm thiam a, Chakma leh Hajong-te an thliarhranna hi an tihtawp tawh a ngai a ni," tiin a sawi.

APCSU chuan Chief Minister Khandu chu AAPSU-in an thil phut nawrna atana August 2 aṭanga state puma nawrh huaihawt an tum chu dang tur an ngen a ni.