Sorkar scheme kalpuinaah inthliarna a awm niin eptu MLA-ten puh

Assam-a eptu party, Congress, CPI(M) leh independent MLA-te chuan BJP kaihhruai Assam sorkarin constituency hrang hranga scheme a kalpuinaah inthliarna a awm tih an sawi.

Chief minister Himanta Biswa Sarma hnenah memorandum thehlutin, eptu party MLA-te chuan an constituency-te chu hriat hran an ni tih sawiin, MMPNA hnuaia kawng siamna tur te, model agandwadi centre siamna tur leh thil danga sorkar hmalaknaah, rorellai MLA bialte chu duhsak bik leh, fund pawh pek tam bik an ni ṭhin tih an sawi a ni.

Tun hnaia state sorkarin thutlukna hrang hrang a siamte chuan mitinte ang khat veka en tura a tihna chu a bawhchhia a ni tiin, hmasawnna tura hnathawhte chu rorellai party MLA-te bialah chuan sawrbing a nih thu an sawi. "I kaihhruai sorkar hnuaia inthliarna nasa tak awm hi a lawmawm lo hle. Hei vang hian rorellai party MLA-te biala hmasawnna a thlen ang bawkin, eptu party MLA-te bialah pawh hna thawh a ni ve tur a ni," an ti. Assam-a assembly bial 126 awmin, heng bial chhunga chengte hi Assam mi leh sa vek an ni, tiin an sawi.

CM hnena memoran­dum thehluhah hian eptu MLA 25-ten an hming an ziak a, an zingah hian Leader of Opposition Debabrata Saikia, Congress hruaitu Rakibul Hussain, Wajed Ali Choudhury and Kamalakhya Dey Purkayastha, CPI(M) hruaitu Manoranjan Talukdar leh independent member Akhil Gogoi-te an tel.