Japan sorkarin Manipur-ah War Museum din dawn

Japan Ambassador to India Kenji Hira­matsu chuan Japan sorkar chuan Manipur-ah war museum a din dawn tih a sawi.

Kenji Hiramatsu chuan museum hi Bishenpur district-a Maibam Lokpa Ching-ah din a nih tur thu sawiin, Maibam Lokpa Ching chu World War II hun laia hmun pawimawh a nih thu a sawi. He hmunah hian British leh Japan sipaite chu nasa takin an indo a, thil hlui hlu tak tak eng emaw zat a awm a ni, a ti. Imphal leh Kohima-ahte pawh kum 1944 March-June-a indonaah khan Japan sipai 70,000 vel zet chuan nunna an chan a ni, a ti. Manipur Chief Minister N. Biren Singh chuan Japan sorkar rawtna hi an thlawp thu sawiin, "Imphal leh Kohima-a indo hmachhawn Japan sipai eng emaw zat chu an ramah an let tawh lo a, heng lai hmunah hian an lu an zalh a ni. Japan sorkar ruahmanna hi state sorkar chuan a thlawp a, theih ang angin a pui dawn a ni" a ti.

Japanese ambassador chuan an ruahmanna te a hlawhtlin theih nan Manipur mipuite chu thlawp turin a ngen a, sipai thi ta te ruhro vawn ṭhat kawngah pawh hmalakpui turin a ngen. Hiramatsu chuan Manipur leh Nagaland-ahte sipai ruhro hi hmuh a ni fo tih sawiin, ruhro tam zawk hmuh belh zel an la in beisei tih a sawi. Kumin November thla khian Indian zirlaite tan Japan-a lehkha zir theihna hun hawn a ni dawn tih sawiin, Japan sorkar chuan Manipur leh Nagaland aṭangin mi 25-te chu Japan ram tlawh turin ruahmnna a siam sak tih a sawi bawk.