Zirlai nu leh pa hnenah exam chhanna pek let remti

Assam Education minister Hi­man­ta Biswa Sarma chuan, Board of Secondary Education, Assam (SEBA) hnuaia class X exam hma­chhawn zirlaite chu an chhanna paper an nu leh pate hnenah sorkarin pek let an remti tih Pathiannni khan a sawi.

Education minister Sarma chuan hei hi sorkarin langtlang taka board exam kalpui a tumna a nih thu sawiin, zirna tihhmasawnna kawnga hmalakna pawimawh tak pakhat a ni, a ti. Zirlai nu leh pate hnena answer script pek let hian ṭangkaina tam tak a neih beisei a ni a, langtlang taka thil kalpui tumna a nih bakah, board exam fel fai leh dik zawk kalpui zel a nih theih nana ruahman a nih thu a sawi. Mahse hei hi tun maiah tihhlawhtlin nghal theih a ni lo a, nakin zel atan a ṭangkai dawn a ni, a ti. Hei hi SEBA-te rawtna a nih thu sawiin, state sorkar chuan a pawm a, hemi atan hian committee pawh din a nih tur thu a sawi.

Sarma chuan zirlaite hnena khawngaih mark pek ṭhin chung­chang sawiin, SEBA chuan uluk leh fimkhur zawkin an kalpui dawn a, mark 1-5 aia tam pek phal a ni tawh dawn lo, a ti. Hei bakah hian subject pathum aia tamah grace mark pek hi board chuan a remti tawh dawn lo tih a sawi. Ruahmanna thar te a taka kalpui turin committee din a ni thuai dawn tih a sawi a, Vice Chancellor kaihhruaina hnuaiah din a ni ang. Pass percentage tihsan chu zirna lama hmasawnna tilangtu pawimawh tak a ni, a tibawk.