Railway ministry-in Passenger thih dan chhui turin hriattir

Railway ministry chuan Assam-a Astha special tourist pilgrimage train-a passenger mi pathum thihdan chu chhui chiang turin thuneitute a hriattir.

Minister of state for Railways Rajen Gohain chuan he thil thleng chung­changah hian Astha special tourist pilgrimage train-a thawktute chu chhui chian an ni dawn tih a sawi. Thawktute hi biak pawh theih lohin an awm tih sawiin, official-te hi chhui chiana action lak a nih tur thu a sawi.

Astha special train hi Assam khawpui Guwahati aṭangin May 9-10 khan North India-a sakhaw hmun pawimawh hrang hrang tlawh turin an chhuak tih a sawi, Guwahati-Varanasi-Haridwar-Hrishikesh-Amritsar-Mathura-Agra panin an tlan a ni. Trip neih chhung hian passenger zinga mi - Binoy Kumar Guin (75), Runumi Hazarika (61) leh Upen Deka (65)-te chu an thi a, an thih dan hi hriatchian a ni lo.

Tarlan dan chuan Astha special train-a chuante hian tui in tur an nei lo a, hei hi a dik theih thu minister Gohain pawhin a sawi. Khua a lum avangin Astha passenger-te hian harsatna an tawk niin a sawi bawk. Gohain chuan railway ministry chuan rel station zawng zawngah water vending machine leh AC dah turin hma lak a nih thu a sawi. Ministry chuan thi chhungte hnenah zángnadawmna a pe dawn tih a sawi bawk.