'Har Ghar Tiranga' programme hnuaiah Assam-ah national flag nuai 80 zar dawn

Sorkar laipuiin ram mipuite rilruah ram hmangaihna rilru tuh thar a nih theihna tura in tina hnam puanzar, national flag zar tura a fuihna, Har Ghar Tiranga programme hmangin Assam sorkar chuan August 13-15 chhung hian an state-ah hnam puanzar nuai 80 zar a ni dawn tih a sawi.

State sorkar thuchhuah chuan he ruahmanna tipuitling tur hian Cultural Affairs Department chuan hma a la mek tih a sawi bawk.

Union Ministry of Culture-in India zalenna champha kum 75 lawmna, Azadi Ka Amrit Mahotsav a buatsaihna hnuaiah, Har Ghar Tiranga programme hmang hian state chhuga rural leh urban-a chenna in, sorkar institute, private entities, school leh sumdawnna hmun hrang hrangah flag hi zar a ni dawn a ni.

Panchayat and Rural Development Department chuan national flag zar tur hi self-help group hrang hrangte a siamtir a ni. Flag hi district leh village level-ah a zawrhna tur siam a ni ang a, mipuite an hnaihvai ber ami an lei thei ang.

State sorkar chuan ‘Har Ghar Tiranga’ programme hi mipui a tam thei angin an zawm theihna turin awarenes activity hrang hrang pawh kalpui a tum. Sorkar laipui chuan he hmalakna hnuaiah hian Independence Day vawi 75-na lawmna pualin ram pumah national flag vaibelchhe 20 zar a tum.

Tripura sorkar pawhin Har Ghar Tiranga programme hnuaiah kumin Independence Day lawmna pualin an state-ah national flag nuai li zar an tum thu an lo sawi tawh bawk.PDS outlet, post office leh panchayat office kaltlangin state mipuite hnenah an ina tar turin an sem dawn a ni.