Tripura HC-in VC inthlan buatsaih turin SEC hrilh

Tripura High Court chuan state election commission (SEC) hnenah Tripura Tribal Areas Autonomous District Council (TTAADC) hnuaia village committee (VC) inthlan chu November chawlhkar khatnaa buatsaih turin a hrilh.

TTAADC-ah hian village committee 587 a awm a ni.

High Court chief justice Indrajit Mahanty leh justice SG Chattopadhyay awmna division bench chuan SEC-in VC inthlan tur a tihkhawtlai zel chungchanga public interest litigation (PIL) thehluh chu ngaihtuahin, commission hnenah hian inthlan neih tur chungchangah a hma thei ang bera thuchhuah siam turin a ti a ni.

VC term hi kum nga niin, an term hi kum 2021, March 7 khan a tawp a ni. Tun thlengin inthlan hi buatsaih a la ni lo a, caretaker administrator-te ruat an ni thung.

SEC hian chhan hrang hrang vangin inthlan hi an buatsaih thei lo niin court a hrilh a, VC inthlannaa electoral roll hi electoral roll pangngai nen a dan avangin, a buatsaihna hian hun pawh a duh rei niin an sawi. Tuna Tripura-a insawn tawh, Bru 21,703-te chu electoral list-ah an la chuang niin a sawi bawk. Electoral roll siamṭhat a nih phawt loh chuan voter nuai khat velin vote an thlak dawn lo a, hei bakah hian Covd-19 hri leng chu inthlan tihkhawtlai a nih chhan pakhat a nih thu a sawi bawk.

Inthlanna tur thil buaipui tur hian a tlem berah ni 137 vel an mamawh dawn niin SEC chuan court hi a hrilh. An inbuatsaih dante thlirin November 28 chu inthlan neih hun atan an ruat lawk chhin phawt niin a sawi.