Pawngsualtua puh AP BJP MLA bail dilna a hnawl

Arunachal Pradesh local court chuan pawngsualtua puh, BJP MLA Lokam Tassar-a bail dilna a hnawlsak. Hetih lai hian Tassar hi chin hriat lohin a la bibo reng a ni.

Koloriang constituency bialtu, BJP MLA hi July 4 khan Itanagar bul, Yupia-a a chenna inah hmeichhe kum 24 mi, naupai lai chu a pawngsual nia puh a ni. Pawngsual tawktu nia insawiin FIR a thehluh hnuah Tassar hi a biru nghal a ni.

Yupia-a district and sessions court-ah Tassar-a'n anticipatory bail a dilna hi a hnawl a, hemi rual hian an puhna chungchang chhui meknaah MLA hian investigating officer-ten thu an zawhfiah theih tura a inlan a ngai a ni, a ti. Arunachal Pradesh police-te pawhin MLA hi man ngei tumin theihtawp an chhuah tih an sawi bawk.

Chief minister Pema Khandu chuan MLA puhna hi a dik a nih chuan BJP chuan a chungah na takin action a la dawn a ni tiin, "Dan chunga leng tumah an awm lo," a ti.