Terror Funding Scam : NIA-in mi 14 thiam loh chan tir

National Investigation Agency (NIA) special court chuan Thawhṭanni khan Assam-a helpawl hnena ṭanpuina sum cheng vaibel­chhe 1,000 pea puh mi 14-te chu thiam loh a chantir.

NIA senior advocate chuan mi 14-te thiam loh chan tir an nih thu hi a puang a, hremna pek tur pawh puan chhuah thuai a ni ang, a ti. Kum 10 dawn liam tawhah khan Assam-a North Cachar Hills district-ah helpawl ṭhenkhat chu ṭanpuina sum pek ṭhin an nih thu a thang a, helpawl Dima Halam Daoga (DHD) leh he pawla an chairman Jewel Gorlocha chu mi ṭhenkhatin sum tam takin an vur nia sawi a ni. Heng ṭanpuina sum te hi India sorkar beihna atana ralthuam lei nan te leh silaimu lei nan te hman a nih thu tarlan a ni bawk. He thil thleng chhui hna hi kum 2009 khan NIA kutah hlan a ni a, special court thutlukna chu puan a ni ta a ni.

Special court-in thiam loh a chantir zingah hian khatih hun laia DHD chairman Jewel Gorlosa, commander-in-chief Niranjan Hojai leh Mohet Hojai pawh an tel a ni. Anni bakah hian North Cachar Hills Autonomous Council (NCHAC)-a chief executive member pakhat leh, social welfare department official pawh an tel a ni. Gauhati High Court chuann kum 2011 khan heng sum leng vela inhnamhnawiha man te chu bail-in a lo chhuah tawh a ni. Hel pawl hruaitu pahnih Gorlocha leh Hojai-te chuan bail-a chhuah an nih hnu hian Bharatiya Janata Party (BJP) an zawm a, Dima Hasao District Autonomous Council inthlanah BJP ticket-in an ding a, thlan tlin zui an ni. Hojai hi kum 2015 khan autonomous council chief executive member a ni zui leh bawk.