Manipur Cabinet-in rehabilitation policy ennawn remti

Manipur cabinet chuan rehabilitation policy ennawn a remti a, he policy hi hel pawl aṭanga sorkar kuta inpe te hamṭhatna tur ngaihtuah sakna a ni.

Cabinet meeting hi Chief Minister Biren Singh chuan a kaihhruai a ni. Hel pawl aṭanga sorkar kuta inpe ten ṭanpuina tura state sorkain thla khata cheng 4,000 a pek ṭhin chu cheng 8,000-ah tihpun cabinet chuan a remti. Hei hi kum thum chhung kalpui a ni ang a, cheng 2,000 pek belh theih an ni. Sorkar kuta inpe helte hnena cheng nuai 2.50 pek ṭhin chu cheng nuai 4-ah tihpun remtih a ni bawk. Pawisa te hi an bank account-ah thunsak ṭhin an ni a, kum hnih chhungin fixed deposit-a dahsak ṭhin an ni. Hei hi kum thum hnuah lak chhuah theih chauh a ni. Hei bakah hian rehabilitation camp-a an awm chhungin dam loh thila an senso 75% thleng sorkarah an bill thei a, hei pawh hi Health Directorate-in a pawmpui a ngai a ni.

Cabinet chuan August 31, 2015-a Churachandpur-a inkahna thlenga nunna chan chhungte leh, ramtuileiloa awmta chhungte chu State Revenue Department-ah Grade III/IV post siamsak a remti. Churachandpur-a sipaite silai hmehpuahah hian mi pariat an thi a, midang pariatte chu ramtuileiloin an awm phah a ni. Hliam tur chhungte pawh cheng nuai nga ṭheuh pek a remti bawk. Meeting chuan June 5 - 7, 2017 chhunga special session nei turin thutlukna a siam a, he hunah hian Manipur Goods and Services Tax Bill, 2017 pharh a ni ang.

Manipur-a disturbed area huam chin chu tihzauh remtih a ni a, mahse hei hian Imphal Municipal area a huam lo ang. State Co-operative Department-ah Technical and Promotion (TP) Cell dah remtih a ni a, Manipur Municipalities (11th Amendment) Bill, 2017 chu assembly-a putluh remtih a ni bawk. Manipur Infrastructure Development Agency (MIDA) din remtih a ni a, Societies Registration Act, 1986 tlawhchhanin State Planning Department din cabinet chuan a remti bawk.

Heng bakah hian cabinet chuan Legal Advisor to Chief Minister, N Kumarjit Singh chu Advocate General atan dah a remti a, Media Advisor chu Coordinator to Chief Minister atan remtiin, a ni hian CM aiawhin Department a vil dawn a ni.