Japan-in Manipur sorkar thawhpui dawn
Japan Ambassador to India, Kenji Hiramatsu chuan Japan sorkain Manipur sorkar chu inkalpawhna kawngpui siam kawngah te, tourism, Loktak Lake cheiṭhat, zirna leh Scheduled Tribe area-a chengte tihhmasawnna kawngah a thawhpui dawn niin a sawi.
Japanese Ambassador chuan India leh Japan inlaichinna chu tihchak a, kawng hrang hranga thawhdun chu Japan sorkar duh dan a nih thu sawiin, a bik takin Manipur nena inlaichinna ṭha tak neih a duh thu a sawi. He thu hi tun hnaia Manipur Chief Minister N. Biren Singh nen an inkawmnaah a sawi a, thawhdunna tur kawng hrang hrangte an sawi dun a ni. Japanese Ambassador leh Biren Singh-te hian Pathianni khan CM office-ah meeting an nei a, skill development chungchang te, Japan-a Manipuri nurse tam zawk tirhluh dan tur leh industry-a Manipuri tam zawk chhawr an nih theih dan turte an sawi dun bawk a ni.
N. Biren chuan Ambassador hnenah hian zirlaiah Japanese ṭawng telh an duh thu a hrilh a, hma lakpui turin a ngen. Hiramatsu chuan language teacher ngaihtuah sak a tiam bakah, zirna atana pawimawh thil dangte ngaihtuahpui a tiam a ni. Manipur mai bakah Nagaland nena inlaichinna ṭha neih an duh thu sawiin, hemi tihlawhtling tur hian hma lak a nih tur thu a sawi. Meeting-ah hian kawngpui siam kawnga thawhdunna tur te, tourism tihhmasawnna tur te, Loktak Lake cheiṭhat leh tihchangtlun dan tur te leh zirna lama hmasawna tur kawng hrang hrang an sawi dun a ni. He hunah hian Manipur-in tourism lama a hmunhma a neih ṭhate tarlanna, tourism department buatsaih chu thlirho a ni bawk.
Manipur sorkar chuan Cable Car Project pahnih kalpui turin ruahmnan a siam mek a, pakhat hi Cheiraoching - Ibudhou Marjing hill-ah siam a ni dawn a, Loktak Lake-a Sendra Hillock leh Chaoba Ching inkalpawhna turin Cable Car service tir tum a ni bawk. Hei bakah hian tourism tihhmasawnna turin House Boat Tourism project a kalpui dawn bawk. Japan Ambassador to India Kenji Hiramatsu chuan Manipur-ah hian Japan sorkar chuan war museum a din tur thu a lo sawi tawh bawk.
Museum hi Bishenpur district-a Maibam Lokpa Ching-ah din a ni dawn a, helai hmun hi World War II hun laia hmun pawimawh tak a ni. He hmunah hian British leh Japan sipaite chu nasa takin an indo a, Japan sipai 70,000 vel zet chuan nunna an chan a ni.