Manipur : Tribal martar mi 8-te ruang phum a ni ta

Manipur Chief Minister N. Biren Singh chuan September 2015-a Churachandpur district-a tharum thawhna thlenga nunna chan ta, tribal martar mi pariatte chu phum an nih tur thu Thawhlehni khan a sawi a, heng martar-te ruang hi nimin khan phum a ni ta.

Kum 2015 khan Congress kaihhruai sorkar chuan anti-tribal bill pathum - Protection of Manipur People Bill, 2015; the Manipur Land Revenue and Land Reforms (Seventh Amendment) BUI, 2015 leh the Manipur Shops and Establishment Bill (Second Amendment) Bill 2015, a pass a, hei hi tribal-te chuan an dikna chanvo rahbeh sak tumna nia ngaiin nasa takin an dodal a ni. Tribal pawl hrang hrang inzawmkhawm Joint Action Committee (JAC) hmalaknain bill duh lohna leh sut leh tura phutin lungawi lohna lantir a ni a, venhim hna thawktu leh nawrh huaihawtte inkarah buaina nasa tak chhuakin, silai hmehpuah a ni. Nawrh huaihawt zingah hian mi pakuain nunna an chan a, heng mite hi tribal-te chuan hnam tana martar-ah an puang a ni. Tribal-te chuan he thil thleng hi an dem takzet tih an sawi a, anti-tribal bill pass tawh chu sut leh turin sorkar an phut. An thil phut hi a hlawhtlin hma loh chuan heng tribal martar mi pariat-te ruang hi an phum loh tur thu an sawi bawk. BJP kaihhruai sorkar a thar a din hnuah JAC-te remtihnain heng martar-te ruang hi phum a ni ta a ni.

Martar-te ruang phumna hun buatsaih hi security thil avangin chief minister chuan a hmanpui lo a, Churachandpur district hi tribal-te chenna a nih vangin atan a him tawk loah ngaih a nih thu officoal-te chuan an tarlang. Martar-te ruang phum a nih tur thu puan ni Thawhlehni khan mi tu tih hriat lohte chuan ruang dahkhawmna-in an hal a, he thil thleng hi chhui chian mek a ni. JAC-in state sorkar inremna siampui a, martar-te ruang hun rei tak vawn ṭhat tawh phum a remti ta hi tribal pawl ṭhenkhat chuan an dodal a ni. All Tribal Women’s Union leh All Tribal Movement Lamka-te chu inremna duh lo zingah an tel a, JAC-in MoU an ziak chu an dem thu an sawi. Inremna ang chuan martar chhungte hnenah state sorkarin cheng nuai nga ṭheuh a pe ang a, bungrua leh thil hlu chan te chu an chhungkaw member zinga pakhat sorkar hna pek a nih dawn bakah, a ṭul dan a zirin he thil thleng hi police-te'n an chhui leh thei dawn bawk a ni.

Inremna ziah a nih hma hian tribal-te chuan district pek an phut bakah, ramdanpui 6th schedule siamṭhat an phut a ni. Mahse state sorkar chuan hei hi thil theih a ni lo tiin, a tihhlawhtlin sak lo.

Churachandpur district-a sipai-te silai hmehpuah avanga thi hi mi pakua an ni a, ruang pakhat phum a ni tawh a, midang pariat te ruang chu hun rei tak chhung vawn ṭhat a nih hnuah, phum a ni ta chauh a ni.