Terror Funding Case : NIA-in mi pathum thi turin an chungthu rel sak

National Investigation Agency (NIA) special court chuan Assam-a hel pawl ṭanpuina sum cheng vaibelchhe 1,000 pek thubuai a chhuina kal zelah, he thila inhnam­hnawih mi pathum te chu thi turin an chungthu a rel sak.

Special court thutlukna hi Thawh­lehni khan puan a ni a, mi pathum thi tura an chungthu rel sak an nih bakah, midang 11-te chu kum 8-12 chhung lungin tang tura tih an ni. Thi tura tih te hi hel pawl Dima Halam Daogah (J) Commander-in-Chief Niranjan Hojai, Chairman Jewel Garlosa, leh North Cachar Hills Autonomous Council (NCHAC) Chief Executive Member Mohet Hojai-te an ni. Heng mi pathum te hi cheng 25,000 ṭheuh chawi tura tih an ni bawk. He thilah hian kum 2009 khan thubuai pahnih ziah luh a lo ni tawh a, NC Hills Council tihhma­sawnna tur sum ṭhahnem tak chu pawhpen nia tarlan a ni. He thilah hian contractor ṭhenkhat te leh sokar offical ṭhenkhat an inhnamhnawih nia sawi a ni a, sum te hi hel pawl DHD(J) hnenah hlan a ni.

Special court hian Thawhṭanni khan helpawl hnena ṭanpuina sum cheng vaibelchhe 1,000 pek a nih chungchanga inhnamhnawih mi 14-te thiam loh chantir an nih thu a lo puang tawh a ni. Kum 10 dawn liam tawhah khan Assam-a North Cachar Hills district-ah helpawl ṭhenkhat chu ṭanpuina sum pek ṭhin an nih thu a thang a, helpawl Dima Halam Daoga (DHD) leh he pawla an chairman Jewel Gorlocha chu mi ṭhenkhatin sum tam takin an vur nia sawi a ni. Heng ṭanpuina sum te hi ralthuam lei nan te leh silaimu lei nan te hman a nih thu tarlan a ni. He thil thleng chhui hna hi kum 2009 khan NIA kutah hlan a ni a, special court chuan mi pathum thi tura an chungthu a rel bakah, midang 11-te chu lungin tang turin an chungthu a rel ta a ni.

Hel pawl DHD-a an chairman hlui Jewel Gorlosa leh commander-in-chief hlui Niranjan Hojai-te hi man an nih hnuah, kum 2009 khan bial-a chhuah an ni. Hemi hnu hian Bharatiya Janata Party (BJP) an zawm a, Dima Hasao District Autonomous Council inthlanah BJP ticket-in an ding a, thlan tlin zui an ni. Hojai hi kum 2015 khan autonomous council chief exe­cutive member a ni zui leh bawk.

Thi tura an chungthu rel sak te hi court sang zawkah an zualko dawn em tih hriat a ni lo.