NLFT-te an intuaithar leh : Tripura police

State assembly election an hmachhawn dawn avangin, hel pawl National Liberation Front of Tripura (NLFT)-te chu an intuaithar leh mek niin Tripura police-te chuan an sawi.

Police-te chuan tunhnai khan NLFT hian an president thar atan Subir Debbarma an ruat tih an sawi a, Debbarma hian Biswamohan Debbarma a thlak niin an sawi. Hruaitu an inthlak thu hi Chief Minister Manik Sarkar pawhin tunhnai khan Belonia-a vantlang inkhawm buatsaihah a sawi chhuak a ni.

NLFT-te hi Chittagong Hill Tracts (CHT)-ah an inbengbel a, Bangladesh aṭangin rami paltlangin India ramaah an rawn lut ṭhin a ni. Nakkum-a Tripura assembly election neih turah hian pawikhawihna thlen tumin an inbuatsaih ṭan mek nia tarlan a ni. Police-te chuan Subir Debbarma, Yamorok tia hriat lar hi NLFT mi leh sa hlun tak a nih thu an sawi. Amah hi Mohanpur sub-division huamchhunga cheng a ni a, kum 2013 khan man niin, a hnuah bail-a chhuah a ni. A nupui Minati Tripura-i chu Khagrachari khuah zirtirtu a ni.

Police-te chuan kum 2015 leh 2016 khan Tripura-ah helte pawikhawihna thleng liantham a awm lo tih an sawi. Hetih lai hian kum 2005 khan Tripura-ah hian tharum thawhna leh inrikrapna thleng ṭum 115 zet a awm a, nunna chan 130 an awm bakah, mihring inrukbona ṭum 65 a thleng bawk.