Manipur leiminin a chhilhte zawn hna titawp

Manipur sorkar chuan Noney district-a Tupul area-a railway construction site-a leiminin a chhilhte ruang zawn hna chu ni 20 chhung thawh a nih hnuah Nilaini khan a titawp ta.

Tun hnaia Manipur-a chhiatna thleng rapthlak ber nia sawiah hian mi 61-in nunna an chan a, leiminna hmun aṭang hian mi 18 chu him taka chhanchhuah an ni.

Leiminin a chhilh mi 56 ruang chu lakchhuah an ni a, hetih lai hian mi dang pangate erawh an chin hriat a ni zui ta lo. An ruang hmuh ni lo mah se, heng mi pangate hi thi ah puan a ni tih chief minister N Biren Singh chuan a sawi a, an zinga pali chu civil mi niin Territorial Army sipai pakhat a awm bawk.

June 30-a chhiatna thlenga thi, mi 61 zinga 30 chu Territorial Army mi leh sa an ni a, a dang chu railway official, inhlawhfa leh tualchhung mite an ni.

Leiminin a chhilhte zawn hna hi National Disaster Response Force (NDRF), State Disaster Response Force (SDRF), Fire, Army leh police-ten an thawk a, an hnathawhna hmunah hian Chief Minister bakah official dangte pawhin an tlawh fo a ni.

Northeast Frontier Railways, Noney District Administration leh MakhuamVillage Authority chuan memorandum of understanding (MoU) ziakin, railways chuan an construction agency hnuaia hnathawk, leimin vanga thi chhungte hnenah hna pek an tiam. Leiminin thil a tihchhiat dante hi Noney district administration leh village authority-ten endikin, report hi railways hnenah an thehlut ang a, anni hian zangnadawmna an pe ang.