SC-in sipai 30-te thubuai 'stay' sak

Nagaland police-ten nikum December thlaa Mon district-a Oting khuaa civil mi 13 kahhlum an nih chungchanga beihpui thlaknaa tel, sipai 30-te thubuai an siamsak chu Supreme Court chuan a 'stay' sak.

State police-ten sipaite thubuai an siamsak chungchangah Supreme Court-ah hian petition pahnih thehluh a ni a, Thawhlehni khan court chuan an ngenna hi a ngaihtuah sak a ni. Petition thehluttu pakhat hi Major Ankush Gupta-a nupui, Anjali Gupta a ni.

Petition thehluttute hian sipaite laka FIR ziahluh chu hnawlsak tur leh, Nagaland sorkarin he thil thleng chhui tura a din, Special Investigation Team (SIT) report leh rawtna siamte bakah, National Human Rights Commission (NHRC) complaint thehluh pawh hnawl turin an ngen. Sipaite hi an hna a nih angin, sorkar laipui thupek anga che an ni tih an tarlang bawk.

Justice Indira Banerjee leh V Ramasubramian-te awmna bench chuan petition thehluh hi an ngaihtuah a, Mon district-a civil mite kahhlum an nih avanga buaina chhuaka paratrooper pakhat thihna thleng pawh chhui zui a la ni lo tih an sawi.