NCERT lehkhabua thu dik lo ziah vangin KSU-in FIR an thehlut

National Council of Education Research Training (NCERT) in Class III textbook atana a pawmah, Meghalaya-a official language-ah Bengali, Nepali leh Marathi tih ziah a ni. Zirlaibua thu dik lo ziah a nih avang hian Khasi Students' Union (KSU) chuan FIR an thehlut.

KSU chuan Ri Bhoi district-a Khanapara Police Station-ah FIR hi an thehlut a ni.

KSU chuan Ri-Bhoi district-a Little Star Senior Secondary School-in an hman, NCERT-in a pawm, Class-III Scoial Studies textbook-ah thil dik tawk loa ziah a nih thu hi July 20 khan an hriat thu an sawi. Zirlaibuah hian Meghalaya official language-ah Khasi leh Garo ti loin, Bengali, Nepali leh Marathi tiin an ziak a ni, an ti. Hetianga thil dik tawk loa tarlan anih vang hian he school zirlaite hi dik lo taka zirtir an nih phah dawn a ni, an ti.

He lehkhabu hi Dr Dhananjay Joshi leh Neelam Jain-te siam niin, Bright Star Books International. 521-Vasant Kunj, New Delhi-in a tichhuak a ni. NCERT hian zirlaibu atana a pawm avangin state danga school ṭhenkhatah pawh an zir dawn a, hetianga an state chungchang dik lo taka inzirtir hian Khasi mite rilru pawh a ti na hle tih KSU chuan a sawi. Lehkhabu siamtute bakah he zirlaibu hmangtu school thuneitute chungchangah a ṭul anga action la turin police-te an phut tih an sawi.