Arunachal Christian Forum-in biak-in hmun phutin nawrh huaihawt dawn

Arunachal Christian Forum (ACF) chuan state sorkarin Tawang kohhran hmun chungchanga buaina chu a chinfel thuai loh chuan September 9 aṭangin lungawi lohna lantirin, ‘Tawang Jao, Church Banao’ movement neih an tum tih an puang.

ACF hian Tawang district-a biak-in sakna hmun tur ram chu pawmsak turin sorkar an phut a, August 19-ah lungawi lohna hi lantir hmasak phawt an tum.

Forum president Toko Teki chuan tun hnaia Tawang district-a Kristian pawl hrang hrangten meeting an neihah he resolution hi an siam tih a sawi. Teki chuan, " Tawang Jao, Church Bano movement neih tur hi Arunachal Pradesh Christian Revival Church Council (APCRCC) president-in a ho dawn a, Himayalan Church president chu member niin he hunah hian Kristian tam tak an tel dawn a ni," a ti. He movement kalpui hunah boruak ṭha lo a chhuak a nih pawhin state sorkar chu mawhphurtu a ni ang, tiin a sawi bawk.

Toko Teki chuan ACF hianTawang mipui leh, sakhaw dangte a dodal lo a, mahse state sorkar thutluka siam danah erawh an lungawi lo tih a sawi.

State sorkarin a din, high-level committee chuan Tawang-a Kristian biak-in chu hmun danga sawn turin an ti a ni. Chief minister Pema Khandu chuan June thla khan biak-in dinna hmun chungchanga buaina hi chinfel dan ngaihtuah pui a tiam a, mahse ram chungchangah thutawp siamtu tur chu DC a ni tih a sawi.