PM-in India rama lei sei ber a hawng

Prime Minister Narendra Modi chuan nimin khan Assam-ah Dhola-Sadiya Bridge hawng a, he lei hi India rama sei ber a ni.

PM hian nimin zing khan Assam hi a thleng a, Chief Minister Sarbananda Sonowal leh Governor Banwarilal Purohit-ten airport-ah an lo hmuak a ni. PM Modi hi Union Minister of Road Transport & Highways and Shipping Nitin Gadkari-an a ṭawiawm a ni.

India ram lei sei ber hawn tak hi three lane a ni a, Assam-a Dhola leh Arunachal Pradesh-a Sadiya inkarah inkalpawhna atana dawh a ni. Lei sei zawng hi km 9.15 niin, Lohit lui chungah dawh a ni a, a siamna senso atan hian cheng vaibelchhe 2,056 hman a ni.

Dhola-Sadiya Bridge hi Nayayuga Engineering Co. Ltd siam a ni a, kum 2011 aanga thawh ṭana ni. India rama lei sei ber ni thin Mumbai-a Mahim Bay aiin km 3.55 in a sei zawk a ni. Lei indawhna hi Assam khawpui Guwahati aṭanga km 540 vela hla a ni a, Arunachal Pradesh khawpui Itangar aṭanga km 300 vel a hla a ni bawk. Lei dawh hian sipai tank, ton 60 chin pawh tlan thei tura duan a ni.

Lei hawn thar hi sipaite tan pawh a ṭangkai dawn hle. Arunachal Pradesh-a hian airport a awm loh avangin sipaite chuan rang zawkin he lei kaltlang hian AP hi an thleng thei tawh dawn a, lei dawh vang hian Assam leh Arunachal Pradesh inkara tlan nana hun hman pawh darkar li in a tihtawi phah dawn a ni.

Modi chuan Dhola-Sadiya Bridge chu ram pum huapa infrastructure pawimawh tak a nih thu a sawi. PM hian nimin tlai lamah khan Khanapara-ah public meeting a hmanpui a, All India Institute of Medical Sciences (AIIMS) leh Indian Agricultural Research Institute (IARI) dinna tur lungphum a phum nghal bawk. Heng project pahnihte hi Assam leh hmarchhak bial tihhmasawnna tur pawimawh tak a nih thu a sawi.