Nagaland Assembly-in GST Bill pass ve leh

Nagaland Assembly chuan kar kalta Inrinni khan Goods and Services Tax (GST) Bill a pass ve leh.

Special session-ah hian Finance changtu Chief Minis­ter Dr. Shurhozelie Liezeiestu chuan bill hi a pharh a, House member-te chuan voice vote hmangin bill hi an pass a ni. Bill hi pass a nih hmain sawihona hun buatsaih a ni a, Minister for Roads and Bridges Y Vikheho Swu chuan GST-in a ken tel thil pawimawh hrang hrangte a tarlang a, member-te chu lungrual taka bill pass turin a ngen a ni. Minister Vikheho Swu chuan GST chu state sorkar tan hamṭhatna tam tak thlentu a ni dawn tih sawiin, chhiah lak a pun dawn bakah, mipuite chuan an chhawr ṭangkai thei dawn a ni, a ti. Hei hian trade and industry lamah nasa takin hmasawnna thlen thei dawn niin a sawi bawk.

Sawihona hunah hian Par­liamentary Secretary for Housing Levi Rengma, Par­liamentary Secretary for Tourism C Apok Jamir, Minis­ter of School Education and SCERT Yitachu leh CM aṭanga bang ta MLA T R Zeliang-te chuan GST chungchang hi an sawi. Bill pharttu Chief Minister Dr Liezietsu chuan, GST chuan rahbi thar pawimawh takah a hlangkai dawn tih sawiin, state sorkar mai bakah ramin nasa takin a ṭhatpui a beisei tih a sawi. Chhiah lak dan inang khat hman chu ram hmasawnna kawnga thil ṭha tak a nih thu sawiin, sorkarah inrelbawlna felfai zawk a awm a beisei tih a sawi. GST chungchangah hian state finance department buatsaihin workshop hi neih alo ni tawh bawk.

GST Bill hi July thla aṭanga hman ṭan turin parliament chuan a pass a, state hrang hrangte pawhin an pass tawh a ni.