Bawng hralh khapna tihchhuahin hmarchhakah zawm a hlawh dawn lo

Sorkar laipuiin tun­hnaia talh tura bawng zawrh leh hralh khapna a tihchhuah chu hmarchhak state-te'n an zawm dawn lo nia tarlan a ni.

Hmarchhak hmun hrang hranga chengte chu bawng zawrh leh hralh khap chungchangah hian an lungrual a, hei hian hmarchhak mipui nawlpuiah nghawng a neih loh phah dawn nia tarlan a ni. Central-a Bharatiya Janata Party (BJP) kaih­hruai NDA sorkar chuan khapna thupek hi a tichhuak a, hei hian bawng chauh ni lo, lawi, sial, sanghawngsei leh ransa hralh suma chang thei te a huam a ni. Thupek chhuah hi state tam tak chuan an dodal nasa hle a, lungawi lohna lantirin hmun tam takah nawrh huaihawt a ni. Hmarchhak state hrang hranga BJP ni lo political party ṭhenkhat pawhin sorkar laipui thuchhuah hi an thlawp loh thu leh, sut leh tura an phut thu an sawi.

Sorkar laipui thuchhuah thlawp lotu zingah BJP mi leh sa ngei pawh an tel. Kumin March thlaa Manipur assembly election neih zawh taka BJP ticket-a dinga hnehna chang zo ta lo Nimaichand Luwang chuan thupek hi Manipur-ah chuan zawm ve a rem lo tih a sawi. Luwang chuan Kristian state a ni a, Muslim leh sakhaw dang eng emaw zat an awm bawk avangin sakhaw thilah harsatna a awm thei a, thupek hi Hindu sakhaw zuitute chuan an thlawp ngei anga, hetih rual hian sakhaw dang zuitute chuan an thlawp ve lo a ni, tiin state tam takah kenkawh a rem loh thu a sawi. Hetih lai hian thupek chhuah a nih hnu hian Manipur khawpui Imphal-ah chuan sa talhna dawr eng emaw zat chu licence leh health certificate fel lo avangin khar a ni.

Hmarchhaka state dang Mizoram, Meghalaya leh Nagaland-ah pawh sorkar laipui thuchhuah hian thlawp a hlawh lo hle a, sawiselna thawm a ring hle a ni. Nagaland Pradesh Congress Committee (NPCC) chuan rampuma hman tura thupek tihchhuah hian 'Prevention of Cruelty to Animals Act, 1960' a kalh niin an sawi a, sut leh turin sorkar laipui an phut tih an sawi. Congress party bakah hian BJP ni lo party dangte pawhin an duh loh thu an sawi chhuak bawk.