Sikkim miin oxygen bur tel loin Mount Everest A lawn chhuak

Sikkim mi mountaineer Kelsang Dorjee Bhutia (36) chuan oxygen tel loin May 21 khan Mount Everest a lawn chhuak nia tarlan a ni.

Dorjee Bhutia hi army team-ah telin May 17 khan Everest base camp a thleng a, May 20 khan tlang hi lawn ṭanin, ogygen bur keng loin khawvela tlangsang ber hi a lawn chhuak a ni. Sikkim Mountaineering Association(SMA) general sec­retary Barap Namgyal Bhutia chuan, Kelsang hian May 19 - 20 khan chhun zan zawmin tlang hi a lawm tih a sawi a, khawṭha lo avangin harsatna a tawk tih a sawi. Heti chung hian May 21 zing dar 7 velah Mt Everest hi a lawn chhuak a ni,a ti. Kelsang hi Sikkim mi zinga Mt Everest lawnchhuak pasarihna a ni a, hmarchhak state zingah Sikkim chu state anga khawvela tlangsang ber lawn chhuak thei tamna ber a nih thu, Bhutia chuan a sawi bawk.

Sikkim Mountaineering Association (SMA) chuan Kel­sang hlawhtlinna an lawmpui thu an sawi a, oxygen tel loa a lawnchhuak chu ropui an tih thu an sawi. Kelsang hi East Sikkim district-a cheng a ni.

Hetih lai hian Manipur mi, Ukhrul district-a cheng Ngayaising Jagoi chuan tunhnai khan a vawikhatna atan Mt Eve­rest a lawn chhuak ve bawk. Manipur aṭanga khawvel tlang sang ber lawn chhuak hmasa ber a nih rual hian, Naga zingah chuan a pahnihna a ni. Jagoi hi Oil and Natural Gas Corporation Limited (ONGC)-a assistant executive engineer a ni.