China-in Dhola-Sadiya Bridge ngaimawh

Prime Narendra Modi-a'n Dhola-Sadiya Bridge a hawn hnu lawkah China a inrawlh nghal a, Arunachal Pardesh huamchhunga a hma lak dan chungchangah India chu chin tawk nei turin a ti.

Chinese Foreign Minis­try chuan, Arunachal chung­changah ram pahnih ten buaina an neih mek laia India sorkarin hmalakna a kalpui chiam hi thil fuh lo tak a ni a, hei hian boruak duhawm loh zawk a hring chhuak thei a ni, a ti. Border chungchangah inremna siam ala ni lo a, boruak muanawm a awm zel theih nan India sorkar chu a hmalakna te kalpui tawh lo turin Beijing chuan a ngen a ni, a ti. Ramri chungchangah hian China chu a dinna ngaiah a ding reng dawn tih a sawi bawk.

Prime Minister Modi chuan kar kalta Zirtawpni khan ram chhunga lei sei ber Dhola-Sadiya bridge (9.15km) hi a hawng a, he lei hi Assam leh Arunachal Pradesh inkalpawhna pawimawh tak a nih chhoh rin a ni. Lei hi Brahmaputra lui chungah dawh a ni a, Assam aṭanga Arunachal a pawhna lai chu China chuan South Tibet huamchhung niin a chhal. Hawn a nih hnu lawk hian Chinese Foreign Ministry chuan thuchhuah a siam ve nghal a, India chetdan chu a sawisel a ni. Lei hi hman theiha hawn a nih tak avangin Assam-Arunachal inkalpawhna chu km 165 zetin a hnai zawk tawh a, India sipai te chuan awlsam zawkin Arunachal an thleng thei ang a, hei hian ram venhim kawngah a puih theih dawn avangin China hian a helh hle nia ngaih a ni.

Kum 1962 khan China sipai, People’s Liberation Army-te chu Arunachal-ah an luh avangin ram pahnihte hi an lo indo tawh a ni. China chuan ramri depah hian hungna bang a siam a, hei hi indona thlen nawn tawh loh nan leh, ramria India sorkar-in inkalpawhna kawngpui a siam loh nana ti nia tarlan a ni bawk.