Manipur CM fapa kum 5 jail tang turin hrem
Manipur Chief Minister N Biren Singh-a fapa Ajay Meetai chu tualthah thubuaiah thiam loh chantir a ni a, kum nga chhung jail tang tura hremna pek a ni.
Kum 2011 khan Irom Roger leh Ajay Meetai-te hi motor kawngpuiah lirtheia intlanpelh chungchangah an intithiam lo a, Ajay Meetai hian Roger hi silaiin a kap a, a thi zui a ni. Hetih hun lai hian Ajay Meetai-a pa N Biren Singh hi Congress sorkarah minister a ni. He thil thleng hi hun rei tak chhung chhui zui a nih hnuah, Manipur trial court chuan Thawhṭanni khan hremna hi a tichhuak a, tharum thawhna thlenga inhnamhnawiha puh Ajay Meetai chu thiam loh a chantir ta a ni. He thil thleng chungchangah hian Irom Chitra Devi chu court-ah a zualko a, kar liamta khan apex court-a Justice L Nageswara Rao leh Navin Sinha-te chuan May 29 thleng insawifiahna hun a pe a ni. Ajay Meetai hi IPC section 304 (culpable homicide not amounting to murder) tlawhchhanin thubuai siam sak a ni.
Irom Roger-a nu leh pate chuan a nunna atana derthawng thei nia an ngaih avangin thubuai an thehlut ngam lawk lo a, sorkarah an chhungkaw tan venhimna an dil a ni. He thil thleng hi state police-te'n an chhui hnuah central agency kutah hlan chhawn a ni. Advocate Kamini Jaiswal chu Roger-a nu leh pa aiawhin Court hmaah a ding a ni.