Su-30 chesual lakchhuah tumin bei zel
Assam-Arunachal Pradesh border-a chesual Sukhoi-30 jet fighter chu a tlakna hriat a nih hnuah, lakchhuah tuma beih mek zel a ni a, a chetsual chhan hriat tumin chhui zui mek a ni bawk.
Search and rescue team-te chuan Thawhlehni khan chetsualna hmunah hian pheikhawk leh, PAN card kang bang leh wallet an hmu a, Su-30 chesualah hian pilot pahnih an chuang a ni. Indian Army, Indian Air Force leh civil administration- team-te chuan chetsualna hmunah hian blackbox an lo hmuchhuak ve tawh bawk. Khaw awm danin a zir loh bakah, a tlakna hi ramngaw chhah tak a nih avangin Su-30 jet fighter lakchhuah hna hi thawhchak theih a ni lo. Indian Army thupuangtu chuan, Pilot pahnihte ruang hi tun thlengin hmuh a la ni lo tih sawiin, ngawrh takin zawn zui zel a ni, a ti.
Arunachal Pradesh Home Parliamentary Secretary Pani Taram pawhin pilot-te zawn hna hi an thawh ve mek thu a sawi. Director General of Police Sandeep Goel chuan kar kalta Zirtawpni zing khan black box hmuh a nih thu sawiin, pilot-te zawn hna pawh West Kameng district huam chhungah thawh leh mek a nih thu a sawi.
Su-30 hi MAy 23 khan Tezpur air base aṭangin a thlawk chhuak a, a hnu reiloteah biak pawh theih lohin a awm zui a ni. India leh China inrina bul hnai Arunachal Pradesh-a Doulasang area a thlen hnuah Control station aṭanga hian biak pawh theih lohin a awm nia tarlan a ni.