Meghalaya sorkarin SSA zirtirtute thla 4 hlawh pe dawn

Meghalaya-a Sarva Shiksha Abhiyan (SSA) zirtirtuten thla nga hlawh an lak tawh loh avanga an hlawh pek phuta nawrh an huaihawt hnuah, state sorkar chu a thla li hlawh pek phawt a tiam.

SSA zirtirtute hian an hlawh tang pek phuta ni li chhung nawrh an huaihawt hnuah, Ningani khan deputy chief minister Prestone Tynsong chuan meeting a neihpui a ni. He hunah hian education department-a senior official-te pawh an tel.

Meghalaya SSA School Association (MSSASA) president Aristotle Rymbai chuan Dy CM hoin meeting ṭha taka an neih thu leh, an hlawh tang mek aṭangin sorkar chuan thla li hlawh pek chhuah a tiam tih a sawi a, a bak thla khat hlawh chu sorkar laipui aṭanga sum an dawn veleh an pe nghal dawn bawk niin a sawi.

Chief minister Conrad K Sangma leh Dy CM Tynsong-te chu Delhi-ah kalin, ministry of finance official-te hnenah SSA zirtirtute hlawh hi pe chhuak turin an ngen dawn a ni.

Dy CM chuan zirtirtute chu an nawrh titawp tawh turin a ngen nghal bawk a, mahse nimin thleng khan nawrh tihtawp a nih thu hi an la puang lo.

SSA zirtirtu 12,541 chuan an hlawh tang pek phut hian Thawhṭanni aṭang khan tiam chin awm loin nawrh an huaihawt leh a ni. Shillong-a Additional Secretariat bula parking lot-ah awmkhawmin, state chhung hmun hrang hrang aṭangin zirtirtute hi an kalkhawm a ni.