Assam district 4-in tuilian la tuar

Assam-a tuilian chuan ziaawm lam a pan zel a, hetih lai hian district palia cheng mi 17,200 velin tuilian vang hian harsatna an la tawk a ni.

Cachar district-ah mi 12,600 leh Morigaon district-ah mi 3,500 vel chu tuilian hian a la tibuai a, Tamulpur district-ah mi 900 velin harsatna an la tawk mek.

Assam State Disaster Management Authority (ASDMA) chuan thingtlang khaw 55 leh thlai chinna ram hectare 237-a zau chu tuilian hian a la chim niin a sawi. Kumin-a ruahsur nasa avanga tuilian leh leimin thlengah Assam-ah hian mi 197 in nunna an chan tawh a ni.

District pathumah tuilian tuarte tan relief camp 11 leh distribution centre siam a la ni a, heng hmunah hian mi 1,253 an khawsa mek a ni. Nilaini khan thuneitute chuan tuilian tuarte tan buhfai quintal 38.43, dal leh chi, mustard oil litre 168.88 bakah mamawh dangte an sem a ni.

State chhunga lui hrang hrangte hlauhawm chhinchhiahna pel an awm tawh lo a, hetih lai hian tuilianin lei leh tuilian danna a tihchhiat tam tak chu siam an la ni lo.

Ningani khan Assam-ah hian Japanese Encephalitis vangin mi pahnih an thih belh leh a, mi 10 in an vei thar bawk. Kuminah Japanese Encephalitis vang hian Assam-ah mi 37 an thi tawh a ni.